2020-12-24
【處理告密】設「報料專線」,變相鼓吹打小報告歪風,小心打散全公司!
打小報告絕對係辦公室嘅常態之一,好多公司對呢種行為有讚有彈,有公司/上司對小報告嘅行為置諸不理,但有公司則開設「報料專線」,「方便」同事打小報告。先唔談論告密內容嘅真偽,其實公司/上司如何處理小報告嘅反應,先係最值得注意嘅事情,直接影響公司文化同風氣,搞不好一個小報告,就能打散全公司。
匿名告密當中有兩個重點,「匿名」同「告密」。員工唔用實名去反映意見,因怕反映意見後會被上司/同事為難,亦可能係告密者對其他同事嘅惡意攻擊,一下子未必容易分清。員工選擇唔用公開方法理性討論,更代表著公司本身嘅不良風氣早已建立,惡性循環沒完沒了嘅攻擊只會更嚴重。
見過好多高管面對告密時,一時間會好嬲,然後二話不說就會招見「被告」,當被告罪名成立去審問佢,完全唔能夠好好處理事情,最後更會開設「報料專線」,希望收集更多「情報」,而改善公司內部問題,但實情只會弄巧反挫。作為上司當收到小報告時,首先要處理好自己嘅反應,先再慢慢了解如何跟進事件。尤其遇上惡意攻擊嘅匿名者時,佢哋會十分在意你嘅反應,繼而有下一步、更多步嘅行動。如果上司對告密反應過大,可能會助長歪風;但零反應,亦會令問題加劇,所以好多資深上司都未能好好對策。
其實第一件最重要嘅事,係要表明管理層唔太接受呢種匿名告密嘅溝通形式,告密嘅內容最後只作參考,不作評論,更應鼓勵匿名者現身說法,先可以令事情更清晰、更有力、真真正正去解決問題。雖然係說易做難,需要長時間建立互信,亦要多方面配合先可以成事。另一方面,要低調地對事件進行調查,到有明確答案再用另一個手法去解決/告知天下,但一定唔可以用告密者嘅出發點去處理,唔可以令員工覺得打小報告係恰當嘅行為。更唔應該公開地建立「報料專線」,一來會收到好多惡意內容,二來會令同事對公司更冇歸屬感,每日返工冇安全感,更難叫同事為公司賣命。
公司係一個好特別嘅地方,員工同公司關係十分微妙,雖然存在著職位高/低之分,但中間嘅角力係平等。員工唔開心可以轉工,成為你前下屬,更可能變成你嘅競爭對手。公司 /上司要拿捏得宜,善用不同溝通方式,建立一個更完善嘅體系,並唔係建立一個打破互信嘅風氣。
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【你點睇】當局擬放寬九龍東商業區土地用途,有議員認為應推廣至全港都開放些少,你是否認同?► 立即投票