【做Marketing的困境】間間都話自己嘅豬扒飯好味，顧客分得出嗎？

　　同一個焗豬扒飯，間間快餐店都話自己係最好食，一間標榜豬扒厚切，一間標榜個飯較大，一間標榜香濃茄味。但其實大家又分唔分得到，以下呢個焗豬扒飯係出自邊間快餐店呢？

　　相信就算你係喺該快餐店打嘅員工，都未必分得出以上個焗豬係邊間打邊間。多年來，幾間快餐店都好想打造自己獨一無二嘅焗豬扒飯，但無疑搞咗咁耐，仲未分出勝負，依然係一個分不清嘅豬扒飯。

　　做marketing最忌係冇differentiation，因為冇differentiation的話，代表你嘅生意／產品難以被顧客認清，另一方面亦代表你嘅生意／產品好容易會被人取代，而以上嘅情況喺香港好常見，不論係餐廳內嘅一碟焗豬扒飯，定還是係整間餐廳，都有以上嘅問題。

　　相信喺香港嘅街頭或者商場內，大家不難見到有啲商店／餐廳嘅店名同Logo都近乎一樣，就例如叫《牛X》嘅餐廳，喺香港應該都有十間八間，而相信大部分嘅顧客，都只因為「就腳」同埋「有位」先會幫襯，食完後該餐廳有乜嘢特色，應該唔會有人會知。

　　因為一直以來香港都係一個文化交集嘅地方，咁多年大家都習慣咗「集各家大成於一身」，而忽略咗創造自己differentiation呢個道理，慢慢「集各家大成」就變成咗香港文化。當然，好嘅係唔需要抄，抄咗亦唔一定做得好，或者抄一半改一半，就變成「新」。100%抄當然唔好，但如果想搵快錢，呢一招有時係有啲用。

　　以《牛X》為例，突然間有一間牛X開店，部分對餐飲業唔太了解嘅人嚟講，短時間會產生咗一個錯覺，誤以為係同一間餐廳，或者係該餐廳嘅分店／分支，如事者咁就可以食住道氣賺一筆。但第一道氣過後，亦好少公司會重新制定公司策略。最常見嘅係，過幾年生意唔好的話，就執笠開過新一間。究竟係香港生意人放棄咗思考生意策略，定係「食頭一浸」然後放棄，就已經係我哋嘅生意策略？

　　與其繼續周旋係對一個豬扒飯之上，或者不停地開牛X，倒不如放棄呢類嘅紅海戰，認認真真地開拓一個新嘅藍海。生意上有differentiation，重點並唔係為咗避開抄襲嘅嫌疑，亦唔係要避免同競爭對手正面交鋒，而係要創造出自己嘅特色，打造一個較長線生意商機。咁樣香港先可以有自己嘅特色，有一個較長線嘅發展。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【與拍賣官看藝術】走進Sotheby's Maison睇睇蘇富比旗艦藝廊！蘇富比如何突破傳統成規？► 即睇