2023-04-21
夏寶龍訪問香港的火花
今日總共有85位議員陪同特首李家超上大灣區考察,訪問多個城市,成為回歸之後最大型、最多議員出席嘅訪問團。不過人多就未必係受注目,事關無晒泛民之下,全部建制派議員北上考察,其實同「返娘家」無乜大分別,所以估計毫無火花之餘,嚟緊媒體嘅著墨亦都未必會好多。
講起火花,上星期港澳辦主任夏寶龍訪港,又估唔到真係會「火花四濺」,不過火花唔係來自夏主任同議員,而係來自愛國陣營之中極有份量嘅盧文端。以盧文端嘅身份地位,當然係會被安排同夏主任見面,而佢見面完之後就特別講到,今次夏主任到來,係證明中央要高度準確掌握香港實際情形,「吸收了經驗,『不會像以前只聽中聯辦匯報』」。呢句說話,政圈中人一聽到,無不嘩然。
(資料圖片)
講呢件事之前,大家先要明白中聯辦同港澳辦喺架構同職能上有咩分別。中聯辦同港澳辦本來兩者都係正部級機關,但係架構上,港澳辦就比中聯辦高半級,而最近經過改組之後,港澳辦喺本身基本之上,組建中央港澳工作辦公室,變相係由國務院層次升格去由黨中央直接管理,港澳辦可以話再跳級。
中聯辦一向都係阿爺喺香港最前線嘅機構,肩負好聯絡工作,當然香港嘅各種情況,中聯辦亦都係要「匯報」去港澳辦,等港澳辦掌握最新形勢。有熟知西環運作嘅建制派就話,港澳辦官員喺國務院,就算身份地位如盧文端咁重要嘅,都唔係話見就見,所以過往有咩嘢意見想表達的話,中聯辦絕對係「唯一」傳聲筒,「你同西環講咗一啲事,佢地話會轉達畀中央知,多數亦即係指轉達畀港澳辦知,但實情幾時傳達同點樣傳達,大家都係不得而知。而中聯辦每日接到咁多訊息,總無可能乜鬼都傳達上去,咁「過濾」就少不免,係咪因為過去一啲事令到盧文端唔多高興?呢個就真係不得而知。」
而綜合各方消息,夏主任喺多個場合之中亦從無直接講過「不會只聽中聯辦匯報」,所以今次事件,極可能都係盧自己一廂情願嘅演繹,亦可以睇下,建制陣營內部之中,亦都係對於一啲事上面有啲「面左左」。
不過盧講完呢句說話之後,各方面都出奇平靜,無再發酵擴散,似乎「維持穩定,唔好自亂陣腳」呢方面,喺建制陣營之中係被「匯報」得最快最準。
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【你點睇】烏軍攻入俄國庫爾斯克州近兩周,並炸毀兩座重要橋樑,你認為俄烏戰爭會否急劇惡化?► 立即投票