上星期講兩代特首就特首嘅選舉方式隔空較量，今個星期再多一個重量級人物加入「戰團」，就係資歷經驗夠晒做特首有餘嘅前立法會主席曾鈺成。

　　先睇一睇阿曾點樣講。佢喺一個訪問之中指出，規定行政長官產生辦法嘅《基本法》第四十五條由三款組成，CY只提及其中第一款，即係「香港特別行政區行政長官在當地通過選舉或協商產生，由中央人民政府任命」，但第二款列明行政長官產生辦法包括三個要素：「實際情況」、「循序漸進」和「由提名委員會提名後普選產生的目標」。阿曾強調：「既然普選是最終目標，從選舉改由協商產生行政長官是退步而不是進步。」

　　阿曾講完佢嘅論點之後，CY都極速撰文反駁，指出雖然《基本法》講明選特首要循序漸進，但係每一屆產生辦法都要當時嘅「實際情況」，如果決定要朝著「有廣泛代表性的提名委員會按民主程序提名後普選產生」目標進發，先要「循序漸進」。但香港嘅「實際情況」，喺CY眼中，就係泛民否定所有之前提出嘅普選方案，「循序漸進」無從談起，所以按「實際情況」，好應該由協商產生。

　　事件發生到呢度，牽涉幾位政壇重量級人物互相較勁，政圈中人無不揑一把汗，正如前文所講，建制入面一群勢力，似乎正傾向將香港一直所推行嘅選舉文化，一下子抹得一乾二淨，就連一直以來已經被阿爺緊緊拿穩提名權同選票嘅特首選舉，都可能被推返行回頭路。

　　幾十年前已經由選舉出身嘅曾鈺成，一手創立嘅民建聯就更加係選舉長勝將軍，萬一由特首選舉開始，慢慢將立法會、區議會嘅選舉都推向「協商」選出，對佢地早已紮根社區嘅本地最大黨嚟講，肯定係最不利，所以阿曾撲出來反對CY嘅建議，絕對可以理解。但問題就係，CY所代表嘅建制政治力量絕對唔講得笑，再睇到親中媒體嘅評論全面配合、和唱，似乎改變香港政治體制會係未來一兩年最重要嘅議題之一。

　　咁啱得咁橋，有傳聞話中聯辦將會大換班，一半人馬將會被換掉，會唔會係香港政治體制作出變革嘅前奏？

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

第九屆「傳媒轉型大獎」請投etnet經濟通一票！► 立即行動