311補選塵埃落定，爆出大冷門，一直以為係最隱陣嘅九龍西非建制候選人、亦係有份被DQ嘅姚松炎嘅囊中物，點知最終宣告落敗，由民建聯嘅鄭泳舜勝出。出面一地都係眼鏡碎，究竟姚松炎輸喺邊？

　　姚松炎輸，其中一個因素係佢面對緊一個強大嘅選舉機器－－建制派，而呢一個選舉機器，經歷過咁多年嘅演進，真係愈來愈強大。2016年立法會選舉之中，九龍西兩個建制派候選人梁美芬同蔣麗芸，合共取得超過10萬2千票，而鄭泳舜所得票數係10萬7千多票，相差只係區區5%，我唔會用「巧合」嚟形容，因為呢個直頭係「藝術」。

　　建制派打選戰真係好似打一場仗一樣，每一個大區劃分各小區，每小區有幾多能夠一呼百應嘅「士兵」（鐵票），一目了然。今次補選，更有傳幕後加大動員能力，要區內嘅頭目搵小頭目再拉人頭，每個小頭目上報拉人頭數目，令到選舉之前，已經充分掌握可得票數。

　　當然，佢地得出嚟嘅票數同實數唔會差得好遠，建制派亦深知，單憑10萬多少少嘅票，唔足以穩贏補選議席；所以建制派選舉工程天衣無縫之下，亦要姚松炎自己有行差踏錯，先能夠創出今次非建制補選敗陣嘅先例。

　　姚松炎得票較2016年選舉非建制陣營整體票數係有明顯下滑。唔計黃毓民同游惠貞嘅得票，其他非建制陣營有11萬8千幾票，顯示姚代表非建制陣營出選，流失咗萬五票咁上下。無獨有偶，上一屆民協代表譚國僑得票又係萬五。睇返各個票站數據，民協區內嘅幾大區選票倉，過往講緊係得到六成以上選票嘅區份，今次補選竟然由鄭贏出，部分贏嘅數目仲要係唔細；顯而易見嘅係，民協並無落力喺今次補選幫手。又或者唔應該降罪民協唔幫手，據聞姚松炎同朱凱迪等等自決派嘅中堅，由勝出初選之後，一直都「不屑」去搵民協呢個老黨幫手，甚至係想同傳統泛民保持距離，諗住自己夠贏有凸。睇輕敵人、看高自己，造就今次慘敗局面！

　　有建制直選老手亦坦言，姚打嘅戰略係新式（網上）為主、舊式（街站）為副，喺後生選民為主嘅區份當然係睇唔出問題，但係一啲傳統老區，選民連你個樣都未見過，街站又擺得少，又點會叫得郁呢班人去投你一票？民協傳統老巢就全部都係呢類票源！姚今次嘅選舉工程，好明顯就係一個錯誤示範，「輸係咎由自取、賴不得人」！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

樂本健【年度感謝祭】維柏健及natural Factors全線2件7折► 了解詳情