10月出發！首個「巴士瞓覺團」！全程76公里，特設3大艙等！包「飯氣攻心餐」兼去2個打卡點！最平幾多錢起？

　　「眼光光，等天光」的境況令不少港人處於痛苦之中！高床暖枕睡不好，卻偏偏在巴士先「瞓得稔」，瞓到恐怕有天會把車窗撞爛！想重拾熟睡的感覺？有旅行社幫到你！主打創新旅遊的ulu travel就開辦了全港首個巴士瞓覺團，特意設計了史上最長巴士線，帶大家圍繞屯門公路和北中嶼山公路兜一圈，全程足足長達76公里，搭足6個鐘，包你可以盡情瞓！

 

行程豐富！食、瞓、玩包齊！

 

　　雖則巴士團的賣點是「瞓覺」，但是瞓足全程又好像不夠gimmick……旅行社就為大家準備了「飯氣攻心餐」，帶大家去打卡兼shopping，全個行程有得瞓，有得影相，有得識新朋友，又有得食，以本地一天遊來說算幾豐富！一齊睇睇詳細的行程先︰ 

 

旅行團坐旅遊巴就試得多，坐巴士又試過未？

（截圖至旅行社網站）

 

　　眾所周知，想瞓一個好覺，飲飽食醉至關重要，所以行程的第一站就會帶各位團友到荃灣西站附近先吃頓西餐再上巴士，好讓大家慢慢蘊釀睡意。嗱！搭長途巴士最擔心的就是出現人有三急，放心，旅行社特別安排了3個廁所點，分別是屯門公路收費站、屯門公園和迪欣湖活動中心，膀胱稍為敏感些都不用太擔心！

 

（截圖自旅行社網站）

 

　　沿屯門公路行駛，巴士就會到達第一個打卡點——堪稱「港版邁亞密」的屯門浩和街！沿海堤壩的旁邊既有大草地和種植了一列棕櫚樹，有山又有無敵大海景，「偽旅行」無難度；再經過屯赤隧道，就會來到行程的第二個打卡點「機場維修區」！這個景點向來都是打卡兼野餐的熱點，簡單的海景、 灰色牆、橋，就連路燈和石頭都可以成為拍照點。略嫌打卡不夠喉，可以選擇在東薈城巴士站下車Shopping，不想行街的團友就可以坐到青衣站巴士總站或是荃灣西巴士站先解散。

 

行程途經兩個熱門打卡點，記得打扮得靚啲去影相「呃like」！

（截圖自旅行社網站）

 

坐位有3大選擇

 

　　巴士瞓覺團極似搭飛機去旅行，有3大艙等任你揀，平時坐開經濟艙的你可以選坐下層的「任您打卡艙」；想「瞓得稔」少少則可以坐上層靜音區「零分貝瞓覺艙」，慢慢瞓足數小時；想睇睇風景、拍拍片的巴士迷就一定要訂上層最前面的位置「VIP全景艙」！如此搞鬼的旅行團大受歡迎，首賣限定優惠名額已經全部售罄，不過大家亦可以用正價團費預訂，由$299至$399不等，費用已經包了午餐、導遊和保險，承惠$300的瞓覺團值唔值得去？那就見仁見智喇！

 

ulu travel —全港首個「巴士瞓覺團」

 

出發日期︰10月16日

集合點︰新界荃灣西楊屋道88號Plaza 88的8樓

價錢︰$299起（視乎座位選擇）

預訂網址︰https://ulu.travel/product/HKTOUR08

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【與拍賣官看藝術】走進Sotheby's Maison睇睇蘇富比旗艦藝廊！蘇富比如何突破傳統成規？► 即睇