2023-05-29
順德大食遊(一)
年初通關,一眾為食老友已口水流流,摩拳擦掌誓要追回三年困在香港的口糠糠。
去邊?日本、台灣當然排頭兩位,不過,論最方便最快,一於先殺上順德,當地人出名嘴尖刁鑽,唔正的食肆,根本冇得企。
一團老友先坐旅遊巴經港珠澳大橋過關,真係麻鬼煩,要兩次拖著行李上車落車行呀行,以今時今日乜都「完善管治」後仍不能一地兩檢, 令老弱傷殘折磨式過關,實在令人費解。難怪條橋拍晒烏蠅,因坐船或高鐵方便N倍也。
抵達珠海後爭取時間,先直上中山,第一頓午餐品嚐「囍家」出品。這次的強項並非飲食,而是感覺。東主品味不凡,將一個荷花池設計得相當有品味,連帶經營的民宿也窗明几淨,值得一宿。
「囍家」景色優美,東主品味不凡。
這隻巨型河蚌,只內地提供,店主指肉路粗,宜看不宜食。
食方面,推薦即場撈起手撕雞。內地歎任何雞,皆不會失手,隻隻雞味濃郁,香港難尋。
撈起手撕雞,雞味濃郁,香港難尋。
另外,煎釀豆腐水準也高。無法明白,為何內地豆腐可做得如此滑。 老饕指出,水質不同,山水做出的豆腐,嫩滑無比。
客家煎釀豆腐,嫩滑無比。
山水? 為何不運來港?又冇禁入口,更非我哋俾唔起錢,真的難明!
飽餐一頓後,立即上順德,先入住順德保利假日酒店,略作休息梳洗,一個轉身,當然再食食食!
囍家
地址:中山市南朗鎮岐山小學旁
電話:0760-8550355。
下一間目標店,名字過癮,叫「大笑飯堂」。此店據報是廣州前市長黎子流公子經營,農家格局,人氣極旺感。一踏入,犀利,燒鵝香味撲鼻而來。點解?因此店招牌出品正是荔枝木燒鵝,枱枱必點,怎不令香味充斥所有空間。
順德飲食新貴「大笑飯堂」,名字一聽難忘。
招牌荔枝木燒鵝,隻隻生劏,一咬即肉汁四溢。
到內地歎雞及鵝,真係好掂,一個字——鮮,已經彈離香港。尤其後者,香港根本冇即劏的新鮮鵝,故此,就算廚師曉飛, 仍難與內地的相提並論。
「大笑飯堂」的燒鵝,肥美多汁,肉質軟棉油潤,是晚最快清碟正是這味。
下次,為免就住就住,我會要求雙倍份量。
呢餐最為滿足,因不少菜式,香港根本冇得食,並非廚功問題,而是材料問題。
例如缽仔禾蟲,生勾勾捉來焗到焦香,不枉山長水遠而來細味一缽,XX著帶來的優質紅酒送入口,真真Wonderful。不過,有一半團友聽見「蟲」已彈開,好吖,你唔食,小弟食埋你嗰份。
焆禾蟲,有人聽見「蟲」字即縮,實則美味非常。
另外,順德雙皮奶,基於水牛奶難尋,有都被當地人搶晒,邊會運來香港吖。所以,欲歎碗鮮美嫩滑雙皮奶,唯有專程上順德嘞。
雙皮奶要用水牛奶製成,內地也日趨罕有,香港怎會有貨?
大笑飯堂
地址:廣東省順德區甲子橋銀畔荔苑北側
電話:0757-2828 6888
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【與拍賣官看藝術】常玉作品屢創天價,背後其實藏著跌宕起伏的人生► 即睇