2022-12-26
沒有無緣無故的人山人海
年多前,想組織一餐全海鮮宴,當時一諗就是操去鯉魚門。不過,疫情之下,聽講成條村拍烏蠅,非常慘淡。
此時,訊息靈通的「為食楊」話:「碌Sir,今時今日歎海鮮,使乜去鯉魚門吖,你去樂富中心海鱻(當時唔鬼知點讀,原來是「鮮」!)城啦,晚晚排隊㗎。你單睇睇佢哋門口魚缸內的陣容,就知我講乜㗎喇。你想食的深海大龍躉,蘇格蘭蟶子皇、阿拉斯加皇帝蟹、大灣區肉蟹花蟹、各式野生海魚、澳洲東西岸大龍蝦、巨型賴尿蝦、波士頓龍蝦、游水大墨魚……總之,幾乎你諗到嘅海鮮佢都有齊!」
阿拉斯加皇帝蟹當造
龍蝦及瀨尿蝦廹爆魚缸
澳洲東西岸龍蝦有齊
講到咁鬼吸引,當然立即拉大隊為食鬼殺去。第一次,真係揾到頭擰擰,因樂富中心商場,唔知邊個刁鑽建築師設計,電梯及內裏空間設計,全不規則,好易迷路。
起初,我以為自己蠢啫,原來,抬頭一望,醫術叻到會飛的「靚仔醫生」莫樹錦,同樣揾到成頭汗,沿途問咗五次人才抵達「終點」。
海鱻城點解晚晚爆瀉?當然不會無緣無故。乃因一間食肆的成功要素,佢全部有齊:一、管理良好。大統帥「在哥」Andy Lai,由日到夜座鎮,解決所有問題。佢乃海鮮界老行尊,入貨線路綜橫,故可盡搜不同產地海鮮,以貨如輪方式經營,全部賣平行家兩三成。此外,Andy也懂廚藝,請廚師是大行家,識英雄重英雄。最新,剛又挖來名牌大集團燒味師傅!二、管理好,生意好,收入滾滾,自然可以請得高質素侍應。人人以團隊精神拼搏,絕無個別連鎖酒樓的劣質文化或員工漫不經心;三、出品水準相當高,兼且穩定。
燒味大廚陳家(左)、Andy(右)
有齊以上三大原素作基礎,任何一間食肆都應唔愁生意。不過,講就易,要落實?你睇睇每年執幾多食肆你就知。
海鱻城開業之後,即成「領展之寶」,因生意額分成,怕且約滿後,議價牙力大增。
講返食,未上海鮮前,客人必須先試——生煎墨魚餅,手打彈牙,內裏有粒粒鮮墨魚,別處難尋;冰燒三層肉。其實是極品燒腩仔。皮脆肉香,入口油花四濺;沙薑鹽水肥雞腳及滷水豬腳仔,皮嫩肉滑。
生煎手打墨魚餅
脆皮肥美冰燒三層肉
其實,食完開場已飽咗一半,收晒貨。
上周,我帶大群為食友再歎埋阿拉斯加大蟹兩食 ——油鹽焗蟹爪、蛋白花雕蒸蟹身,正!點解呢種蟹狂受歡迎?因鮮美無比啖啖肉。
皇帝蟹兩味:油鹽焗頭爪、旦白花雕蒸身
此店天天由蘇格蘭空運而來九吋長蟶子王,最佳豉汁蒸之加煎米粉底!
蘇格蘭九吋蟶子王
最搞笑,是晚在座有位英國老移民,嘆謂:「點解我在英國咁多年都從未得嚐如此美食?」
蒜蓉蒸肥帶子
古法扣羊腩
生炒糯米飯
紙短情長,大家想幫襯,若卜到位,就記得揾「在哥」,話明係碌Sir粉絲,拜託佢寫菜單及介紹不時不食的最靚海產可也。
海鱻城
地址:九龍樂富廣場二期UG2層U206舖
電話:2688 0908
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
WoW WoW星期三:2024最後一擊! (只限今天)► 火速行動